ගම්පොල සුද්දාගේ හිංසන විලාපය  සහ සත්ත්ව ප්‍රේමීන්ගේ 2020 ප්‍රාර්ථනාව


සත්ත්ව හිංසනය පිටුදැකීම වෙනුවෙන් දේශීය හා ජාත්‍යන්තර වශයෙන් ක්‍රියාත්මක සංවිධාන රැසකි. ඔවුන් දිවා රෑ වෙහෙසෙන්නේ ලොව කොතැනක හෝ සිටින සත්ත්වයකු සත්ත්ව කෲරත්වයෙන් බේරා ගැනීමය. තිරිසනුන්ට බොහෝ දේ වැටහුණද අනෙක් ජීවින්ගේ ජීවත්වීමේ අයිතිය උදුරා ගැනීමට මාන බලන, ඔවුන් පිළිබද සිත් පිත් නැති බොහෝ දෙනෙක් මේ මිහිමත ජීවත්වෙති. අවාසනාව නම් ඔවුන්ගේ පරිසරයේම අපට ජීවත්වීමට සිදුවීමයි.

සත්ත්ව හිංසනය සම්බන්ධයෙන් කලෙන් කලට මතුවන මාතෘකාවලට අමතරව අප‌ නොදැනුවත්ව මේ මිහිතලය මත වැළලීයන කතා කොතෙකුත් තිබෙන්නට පුළුවන. ඒ හැම කතාවකටම සුවිශේෂී වැදගත්කමක් තිබෙන බව නොරහසකි. එක් අතකට ඒ සියලු කතා අප නෙතු නොගැටෙන්නේ වාසනාවකටය. නැතිනම් ජීවිත කළකිරීම මෙයට වඩා ජීවිතයට බරක් වනු නියතය.

පණපිටින් පිළිස්සීම් තුවාල ලබා මියගිය මීගමුවේ චාලි සුනඛයාගේ කතාව ඔබට තවමත් මතක ඇතිවාට සැක නැත. එපමණක් නොව වයස්ගතව ශරීරය කුශ වී සිටියදිත් පෙරහරට එක්වු ටිකිරි අලියාගේ කතාව තවත් පැතිකඩකි. ටිකිරිද දැන් ජීවතුන් අතර නැත. ඒ ආකාරයට ප්‍රසිද්ධියට පත් නොවුනද ශ්‍රි ලංකාවේ අප්‍රකටව දිනපතා සිදුවන සත්ත්ව හිංසන සිද්ධිවල නම් කෙළවරක් නැත. 

ඉතා මෑතක එවැනි අවධානයක් දිනාගත් සිදුවීමක් වුයේ තියුණු ආයුධයක පහර කෑ ගම්පොල  සුනඛයාගේ කතාවයි. සමාජ ජාල වල දැනට ප්‍රකට ගම්පොල සුනඛයාගේ කතාවද අතිශය ශෝක ජනකය.

රොෂාන් චිට්ටි ෆේස්බුක් පිටුවේ තබා ඇති සටහනකට අනුව නම් ගම්පොළ සුද්දා ලෙස හදුන්වන සුනඛයා පාපතරයකුගේ පිහි පහරවල් 15කට පමණ ලක්ව බරපතල තත්ත්වයෙන් ජීවිතයත් මරණයත් අතර සටනකට මුහුණ දුන්නෙකි. පිහියකින් හෝ තියුණු ආයුධයකින් පහරකෑවෙකු නැවත බේරෙයිදැයි ඔබට සිතෙන්නට පුළුවනි. නමුත් එතරම් බරපතල තත්ත්වයෙන් පසුවුවද තම ස්වාමියා සොයා නිවසට ඒමට තරම් හිත සවි කරගත් මේ සුනඛයා කිලෝමීටර් එක හමාරක් පමණ ඈතක සිට ලේ ගලන ශරීරය කැටිව සිය ස්වාමියාගේ නිවස සොයාගෙන පැමිණ තිබේ. 

කිලෝමීටර් එක හමාරක් දුරට ලේ වලින් ඉරි ඇදි ගම්පොළ සුද්දාගේ වේදනාව ඔබට අලුතින් නොකිව මනාය. මෙම සිද්ධිය පිළිබදව සමාජ මාධ්‍ය තුළ  පසුගිය කාලය පුරාවට බොහෝ තොරතුරු පළවිය. 

ප්‍රමාදවන සෑම මිනිත්තුවකම තිබුණේ ගම්පොළ සුනඛයාගේ ජීවිතය පිළිබද අවිනිශ්චිත බවකි. සත්ත්වයන්ට ආදරය කරන, සත්ත්ව හිංසාව පිටුදකින සමාජ මාධ්‍ය ජාලයේ යම් පිරිසක් ගම්පොළ සුද්දාවෙනුවෙන් තම හැකි පමණ ආධාර උපකාර කිරීමට ඉදිරිපත්වුයේ මේ අවස්ථාවේය. 

ශිල්පා සමරතුංග ගේ වචනයෙන් ඇය සමාජ මාධ්‍ය ජාලයේ තැබු සටහනකට අනුව සුද්දාගේ සිරුර එකවර බැලීමට තරම් අපහසු තරමට අසතුටුදායක තත්ත්වයකට පත්ව තිබිණි. සුද්දා වේදනාව පිටකරන අයුරු තිරිසනෙකුටවත් බලා සිටිය නොහැකි තරම්ය.කොළඹට ගෙන ආ වහාම සුද්දා සැත්කමකට යොමු කිරීමට රොෂාන් චිට්ටි සහ ශිල්පා සමරතුංග වහා කටයුතු කරනුයේ සුද්දාගේ ජීවිතය ගලවා ගැනීමේ අරමුණ පෙරදැරිවය.

මෙම සැත්කම පැය 4කට අධික කාලයක් තුළ ක්‍රියාත්මක විය. සුද්දා ගැන යම් බලාපොරොත්තුවක් දැල්විය හැකි මට්ටමට පැමිණ තිබුණේ ඉන් අනතුරුවය. සත්ත්ව කරුණාවක් මනසින්වත් දැක නැති පාපතරයකු නිසා ජීවිතය අහිමිවීමට ගිය ගම්පොල සුද්දාට නැවත ජීවය ලැබී ඇත්තේ ශිල්පා ඇතුළු පිරිස කළ මේ මැදිහත්වීම සහ ඊට සද්භාවයෙන් අධාර උපකාර කළ පිරිස නිසාය. තවමත් ගම්පොල සුද්දාට සියයට සියයක් සුවය ලැබී නැත. ඔහු රැකවරණයට ගෙන බලා කියා ගන්නා ශිල්පා ඒ වෙනුවෙන් තවමත් හිත් පිං ඇති මිනිසුන්ගේ ආධාර උපකාර ඉල්ලමින් සිය ෆේස්බුක් පිටුවේ තොරතුරු පළ කරන්නීය.

පසුගිය කාලයේ සමාජ මාධ්‍යයේ පළවු තවත් වීඩියෝවකින් දැක්වුයේ සුරතල් පුසෙකට කළ පහරදීමකි. එම පුසා ජීවිතය සහ මරණයට පණ අදිමින් සිටින අයුරු බලන්නට තරම් අමිහිරිය. මේ සියලු කතාවලින් කියැවෙන්නේ එකම කතාවකි. ඒ තවමත් මේ මිනිස් සමාජය තුළ තිරිසන් සිත් ඇති මිනිසුන් ජීවත්වන බවයි. ඔවුන් මිනිසුන්ගෙන් එපිටට ගොස් සත්ත්වයන්ට හිංසා කරමින් සිටින බවයි. 

අප කොතෙකුත් සත්ත්ව අයිතීන් වෙනුවෙන් හඩ නැගුවද සමාජයක් එකවර උසස් මනසකින් පෝෂණය කොට ඔවුන් එම සිතිවිලිවල ගිල්ලවීම අපහසුය. නමුත් අනෙකාගේ වේදනාව, අනෙකාගේ ආදරය, අනෙකාගේ අපේක්ෂාව සහ අනෙකාගේ ජීවිතාර්ථය තේරුම් ගැනීමට තරම් අපොහොසත් මිනිසුන් මිහිපිට ඇතැයි ඔබ සහ මම කෙසේ විශ්වාස කරන්නද ?  

වේදනාව සියලුදෙනාට පොදුය. ආගම දහමින් වුවද සමාජයක් සුපෝෂිත කිරීමට වෙර දරන්නෙ තමන් ගැන තේරුම් ගැනීමකට වඩා මිනිස් ජීවිතයේ වටිනාකම් තේරුම්කර දීමටය. සතා සිව්පාවුන්ගේ ජීවත්වීමේ අයිතිය තේරුම් ගැනීමට එවැනි ඔවදන් ඔනෑවටත් වඩා ප්‍රමාණවත්ය.

2019 වසර ඇරඹුනේ මීගමුවේ චාලි ගැන ආන්දෝලනයෙනි. 2019 වසර අවසානයට පැමිණ ඇත්තේ ගම්පොළ සුද්දාගේ ආන්දෝලයෙනි. චාලි සුනඛයා මෙලොව හැර ගියද ? ගම්පොළ සුනඛයා සුද්දාට තවමත් ජීවත වරම් හිමිව තිබේ.ඒ සිත් පිත් ඇති මිනිසුන්ගේ සත්ත්ව කරුණාව නිසාය.

සත්ත්වයන් ඉලක්ක කරගනිමින් මෙසේ සිදුවන කෲරත්වය සම්බන්ධයෙන් අප නීතිඥ වොසිතා විජේනායක මහත්මියගෙන් විමසීමක් කළේය. 

“ සත්ත්වයන් ඉලක්ක වු කෲරත්වය ශ්‍රි ලංකාවේ දිනෙන් දින ඉහළ යන බව අසන්නට ලැබීම කණගාටුවට කරුණක්. රටක් ලෙස අප මෙම තත්ත්වයෙන් අත්මිදිය යුතු වෙනවා. 

අප නිතර බලධරයන්ට සිහි කැදවන සත්ත්ව සුබසාධන පනත් කෙටුම්පත පාර්ලිමේන්තුවට ඉදිරිපත්වී වසර ගණනාවක්. අප විශ්වාස කළා සියලුම සත්ත්වයන්ට හිංසාවෙන් තොරව ජීවත්වීමේ අයිතිය තහවුරුවීම සදහා සත්ත්ව සුබසාධන පනත් කෙටුම්පත පනතක් ලෙස පාර්ලිමේන්තුවේ සම්මතවනු ඇතිබවට. නමුත් තවමත් එය යතාර්ථයක් වී නැහැ. සියලුම සත්ත්ව අවිහිංසාව අගයන පුද්ගලයන් හා සංවිධානවල 2020 වසරේ බලාපොරොත්තුව මෙම පනත සම්මත කර ගැනීම යැයි නීතිඥ වොසිතා විජේනායක මහත්මිය පැවසුවාය.

2020 වසර ආරම්භවීමට ඇත්තේ තවත් දින කිහිපයකි. සත්ත්ව හිංසනය වෙනුවෙන් හඩ නගන බොහෝ දෙනෙක් අලි ඇතුන්, සුනඛයන්, පුසන්, ගවයන් සහ තවත් බොහෝ සත්ත්ව කොට්ඨාශවල අයිතිය වෙනුවෙන් පෙනී සිටිති. වර්ගීකරණය වන සුරතල් සතුන්ට මෙන්ම අනෙකුත් ලොකු කුඩා සියලු සතා සිවුපාවුන්ටද ජීවත්වීමේ අයිතියක් තිබේ. ඒ අයිතිය පිළිගැනීමට මෙන්ම තිරසනුන් ලෙස හැසිරෙමින් ඔවුන්ට වද හිංසා පමුණවන්නන් හෙළා දකිමින් ඔවුන්ට එරෙහිව නීතිය ක්‍රියාවට නැංවිය හැකි සමාජ වට පිටාවක් නිර්මාණය විය යුතුය.

සත්ත්ව හිංසකයන්ට යම් ප්‍රමාණයකට දඩුවම් දෙන සත්ත්ව සුබසාධන කෙටුම්පත 2020 වසරේදී හෝ පනතක් ලෙස බලාත්මක කරගත හැකිවේවා යන්න මෙරට සියලු සත්ත්ව ප්‍රේමීන්ගේ 2020 ප්‍රාර්ථනාව වනවා නොඅනුමානය.

සටහන – රමේෂ් වරල්ලෙගම